మహా ప్రసాదం

గుళ్ళో అన్నదానం చేస్తే పుణ్యమంటారు ,అన్నం కోసం ఎదురుచూసేవాడికి గుడిలోపల ప్రవేశం ఉండదు.
కడుపు నిండినవాడికి అన్నదానం రోజులాగే మరో పూట భోజనం
ఆకలితో కడుపు పట్టుకున్నవాడికి నిజంగానే అది మహా ప్రసాదం.

అమ్మ అనురాగంతో ఎదిగిన గొప్ప బంధం

ఒక జతగా కలిసుండడం కుదరదన్నారు, ఒకే జత బట్టలతో సర్దుకుపోయిన రోజులు మరిచారు
ఆస్తులు విడివిడిగా పంచమన్నారు,అమ్మ చేతి ముద్దలు ఒకటిగా పంచుకున్న క్షణాలు గుర్తురెగరు
వస్తువైనా బంధమైన నీది నాదన్నారు, కష్టమైనా సుఖమైన మనవన్న జ్ఞాపకాలు మిగలలేదు

చిన్నప్పుడు అమ్మ నేర్పించే బొమ్మలాటలాడారు, ఇప్పుడు డబ్బు ఆడించే మనుషులాటలో బొమ్మలయ్యారు
అప్పుడు బొమ్మకోసం సరదాగా కొట్టుకోనేవారు, ఇప్పుడు డబ్బు కోసం నిజంగానే కొట్టుకుంటున్నారు.

అమ్మ అనురాగంతో ఎదిగిన గొప్ప బంధం అన్నదమ్ముల అనుబంధం
ఎదురుపడితే కళ్ళలో ఆ అనురాగం నింపిన స్వచమైన ప్రేమ స్మృతుల చిరునవ్వులు కనపడాలే కాని డబ్బు పెంచిన విద్వేషాలు కావు.
లోకంలో ప్రతీది జతగా చూసిన ఆ కనులు ఇప్పుడు ఎదురుపడితే ఒకరి నుంచి ఒకరు దూరంగా వెళ్ళే పరిస్థితి ఎప్పటికీ రాకూడదు.

చిరునవ్వుకి వెలకట్టి

నీకు నచ్చకపోయినా నవ్వుతూ సర్దుకుపోవడం
సర్దుకుపోయిన ప్రతీసారి నవ్వలేక విసిగిపోయి గొడవపడడం
గొడవలో నీ ప్రతీ చిరునవ్వుకి వెలకట్టి దానినే త్యాగమనడం.

నీకిష్టమైన వారికోసం చేసేది నీకు సంతోషాన్ని కలిగించలేదంటే ఆ పని చేయడం కంటే ఎందుకు చేయలేవో అర్ధమయ్యేలా చెప్పగలిగితే మేలు
అది అర్దంచేసుకున్నారంటే నీ అదృష్టం లేదంటే మరో ప్రయత్నం.

బంధువైన ఆప్తుడైన నువ్వే

సంపన్నుడి తప్పుడు పని సామాన్యుడి గొప్ప పని కంటికి కనపడదు
నోట్లున్న నోట చెడుమాట పాట్లున్న చోట మంచిమాట మనసు గుర్తించదు

డబ్బుంటే మంచైనా చెడైనా ఈ లోకం నీవెంటే, డబ్బులేని విలువలంటే నీ బంధువైన ఆప్తుడైన నువ్వే

చేదు జ్ఞాపకాలు

ఎదుటివారి అనుభవాలు నిన్ను అప్రమత్తం చేసే తుఫాను హెచ్చరికలు
సొంత అనుభవం ఆ తుఫాను విధ్వంసం మిగిల్చే చేదు జ్ఞాపకాలు

ఇష్టపడుతున్నారనే అందమైన భావన

ఇష్టపడ్డ అమ్మాయి వెంటపడి మెప్పించి ఒప్పించి ప్రేమని చెప్పించేవాళ్ళు కొందరు
అమ్మాయే మనసుపడిందని ఎగిరి గంతేసి ప్రేమని స్వీకరించి ప్రేమించబడేవాళ్ళు మరికొందరు
ఇష్టాన్ని చెప్పలేక ఇష్టపడేవారు దొరకక ప్రేమ తమ వంటికి పడదని తిరిగేవారు ఇంకొందరు

ప్రతి మనిషి తన జీవిత పయనంలో ఏదో ఒక క్షణం తనని ఒకరు ఇష్టపడుతున్నారనే అందమైన భావన కోరుకొని వుంటాడు

డబ్బు

డబ్బు వుందని చూపించేవాడికి పదిమంది తన గురించి ఏమనుకుంటున్నారనే దిగులు
ఆ డబ్బుతో కన్నీళ్లు తుడిచేవాడికి తను చేసిన పని నలుగురికి ఉపయోగపడిందనే ఆనందం

దిగులుపడే స్నేహం

నువ్వు కనపడకపోయినా చాలా బాగుండాలని కోరుకునేది ఒక స్నేహం
నీ ముందు నవ్వుతూ కనపడినా ఎలా బాగుపడ్డావని దిగులుపడేది మరొక స్నేహం

అమ్మాయి క్యారెక్టర్

పెళ్ళికి ముందు అమ్మాయి క్యారెక్టర్ గురించి ఆరా తీసేవాడికి పెళ్ళి తరువాత నమ్మకం అనే మాట వాడే అర్హత లేదు

ఓ బ్రహ్మచారి మనోవేదన

పెళ్లి చూపులు చూసి చూసి అలసిన ఓ బ్రహ్మచారి మనోవేదన 

పాతికేళ్ళు నిండాయి,అన్ని అర్హతలున్న పెళ్ళీడుకు వచ్చిన కుర్రాడిగా నా స్థితి ||
నాకు అమ్మాయి చదువుతో పాటు అందం వుండాలి
నాన్నకు సొంత ఇల్లుతో పాటు మంచి కట్నం ఇవ్వాలి
అమ్మకి బంగారంతో పాటు పట్నం పిల్ల కావాలి
బామ్మకి కులంతో పాటు గోత్రం తెలిసిందయి వుండాలి

మరో రెండేళ్ళు గడిచాయి,అన్ని అర్హతలున్న పెళ్ళి వయసు దాటిపోతున్న అబ్బాయిగా నా పరిస్థితి ||
నాకు అమ్మాయి పెద్ద అందంగా లేకపోయినా గుణం మంచిదయి వుండాలి
బామ్మకి గోత్రం ఏదయినా కులం మాత్రం ఒకటయి వుండాలి
అమ్మకి ఊరి పిల్లయినా బంధువులు గొప్పగా చెప్పుకునే సంబంధం అయి వుండాలి
నాన్నకి కట్నం ఇవ్వకపోయినా ఇల్లు కట్టుకోనేంత స్థలం ఇవ్వాలి

ఇంకో నాలుగేళ్ళు పోయాయి, చెల్లి పెళ్ళి కుడా అయి వయసు తప్ప అన్ని అర్హతులున్న మనిషిగా నా దుస్థితి ||
నాన్నకి లాంచనాల కంటే అమ్మాయి తల్లిదండ్రి పడే బాధలు అవమానాలు కనిపించాయి
అమ్మకి బంగారం కంటే అనురాగం విలువైనదని తెలిసొచ్చింది
బామ్మ బతికుంటే ఏమనుకునేదో తెలియకుండానే పైకి పోయింది
నాతో పాటు ఇప్పుడు ఎవరికీ ఏ ఆంక్షలు లేవు అయినా నాకు పిల్లనివ్వాలన్న కాంక్ష ఎవరికీ లేదు.

చూపులు కలిసిన ప్రేమ మనసులు కలిసిన ప్రేమ

నీ నడకలోని హొయలకు కాదు ఆ నడవడికలోని సొగసులకు నా మనసు జోహార్లు
నీ పెదాల అందాలు కాదు అవి పలికే పదాలు మదిని మాయచేసే మాటల మంత్రాలు
నీ కంటి మెరుపులు కాదు అవి నింపుకున్న అనురాగాలు మేనిని చుట్టే వెన్నెల వెలుగులు
నీ చేతి స్పర్శలోని పులకరింత కాదు అవి అందించే సాయంలోని గొప్పతనం వెల కట్టలేనిది
నీ పాదాలు అలంకరించుకున్న రంగులకి కాదు అవి ఎంచుకున్న ఆదర్శాల అడుగులకి నేను దాసోహం

కాలంతో పాటు కరిగిపోయేది సొగసు, ఆ కాలం మట్టిలో కలిపేంతవరకు తిరుగులేనిది మనసు
అందుకేనేమో చూపులు కలిసిన ప్రేమ మనసులు కలిసిన ప్రేమ అని రెండు రకాల ప్రేమలు వింటుంటాం

దగ్గరవ్వని మనుషుల సావాసం

నీకు దగ్గరవ్వని మనుషుల సావాసం కోరుకుంటే నేర్చుకొనేది గుణపాఠం
నిన్ను కావాలనుకొనే మనుషులను దూరం చేసుకుంటే మిగిలేది పశ్చాత్తాపం.

సుమధురం

తొలకరి చినుకు పులకరింతలో భువనము, చిన్నారి మేనువు గిలిగింతలో నవ అణువులు వెదజల్లే సువాసన సహజం సుమధురం.

సాగించే జీవిత పయనం ఒకటే

నీ మంచిని మాత్రమే పరిచయం చేసే ప్రేమ పెళ్లి, నీ మంచి చెడు తెలియని పెద్దలు కుదిర్చిన పెళ్లి సాగించే జీవిత పయనం ఒకటే.

దోస్త్ దోస్త్ దోస్త్

గర్ల్ ఫ్రెండ్ వున్న ఫ్రెండ్ గాడి ఆవకాయ్ ఐస్ క్రీమ్ జీవితం గురించి గర్ల్ ఫ్రెండ్ లేని మరో ఫ్రెండ్ ఆవేదన 

మాతో దమ్ముకి కేఫ్ లు, అమ్మాయితో సొల్లుకి కెఫే డేలు
ఇక్కడ బండి మీద బజ్జీలు, అక్కడ డామినో పిజ్జాలు
మా ఫ్రెండ్స్ తో గల్లి మాస్ సినిమాలు, ఆమె ఫ్రెండ్స్ తో ఐమాక్స్ లు సినీ మాక్స్ లు 
ఈడ మందులో తీన్ మార్లు , అక్కడ బంజారాలో డిస్కో జోర్లు
మాకు ఫోన్ లో ఇప్పుడు బిజీ,ఆమెకు చాట్ లో ఎక్కడికైనా రెడీ
మా ఔటింగు కి గండి మైసమ్మ జాతర, ఆమెతో డేటింగు గండి చెరువు పార్కు దగ్గర 

అయినా అవసరమయితే వాడికోసం తన్నడానికైన, తినడానికైన రెడీ, ఎందుకంటే వాడు మా దోస్త్ దోస్త్ దోస్త్ ...

ప్రేమ చేరువకాని దూరమయితే

కంటి ముందర మనిషి ప్రేమ మనసు దాకా చేరదు, ఆ ప్రేమ చేరువకాని దూరమయితే జ్ఞాపకాలు మనసు వీడవు.

నమ్మకానికి పునాది

అబద్దంతో పరిచయం వ్యసనానికి నాంది, నిజంతో స్నేహం నమ్మకానికి పునాది.

మనిషి జీవిత సూత్రం

కోరుకున్నది దక్కితే అదృష్టం, అనుకోనిది జరిగితే జీవితం. ఇదేనేమో మనిషి జీవిత సూత్రం

తప్పు లేకుండా

నీ తప్పు లేకుండా ఎదుటి వారు నిన్ను తప్పుగా అనుకుంటే భాధపడడం అనవసరం
నీ తప్పు ఒప్పుకోకుండా ఎదుటివారిది తప్పని వాదించటం అర్ధరహితం

బుడతడి గిన్నెలో పప్పన్నం

దేవుడి గుళ్ళో ప్రసాదం, బుడతడి గిన్నెలో పప్పన్నం అద్బుతః

ధరణి

నింగి పరచిన మల్లె మబ్బుల పరుపుయై, ఆ నింగిలోని తారలన్ని మార్లు పడిలేచే తన చిన్నారుల నడకను వీక్షిస్తూ ఆనందపడే అమ్మ ఈ ధరణి.

నలుగురికి భయపడి

కూతురి పెళ్లి నలుగురు మెచ్చేల ఘనంగా చేసామని ఆనందపడే మీరు, తన కష్టాలలో మీ ఇంటి తలుపు తడితే ఆ నలుగురికి భయపడి తన ఇంట్లో తనే భారమనే భావన కల్పించకండి.

ఒకే ఒక బంధం శాశ్వతం

స్నేహితుడు తిరుగు స్నేహాన్ని ఆశిస్తాడు,ప్రియుడు లేదా ప్రియురాలు తిరుగు ప్రేమని కోరుకుంటారు
ఇలా ఎన్నో బంధాలలో నువ్వు తిరిగి ఇవ్వలేని రోజున అవి నీతో ఉండకపోవచ్చు.

ఈ లోకంలో నువ్వు ఏమి ఇవ్వకపోయినా ఒకే ఒక బంధం శాశ్వతం, అదే అమ్మ. అందుకేనేమో నీ కసురులు,నీ కోపాలు, నీ అలకలు ఇలా అన్ని అమ్మపైనే.
కాని ఆ అమ్మ చివరి గడియల్లో కోరుకొనే ఒకే ఒక్క కోరిక ఆ హృదయం నేర్పిన నాలుగు ప్రేమ మాటలు.

అందరూ నీవాళ్ళే

సుఖంలో నీ కంటికి అందరూ నీవాళ్ళే, కాని కష్టాన నీ మనసు వెతికేను అసలెందరు నా వాళ్ళని.

బలమైన బంధం

బలమైన బంధం అంతరానికి తావు లేని ఇద్దరి మనుషులది కాదు, ప్రతి అంతరాన సర్దుకు పోయే ఇద్దరి మనసుల జీవిత పయనం.

సిగ్గులేకుండా తినేది

తినే తిండి దగ్గర మొహమాట పడకూడదంటారు,
కాని పడుతున్నామంటే మనం ఉన్నది పరాయింట్లో,సిగ్గులేకుండా తినేది మనం అనుకునే వారింట్లో.
పరాయింట్లో పది రుచులుండొచ్చు కానీ మనింట్లో ఒక్క రుచి అయినా ప్రేమతో వడ్డించే పది చేతులుంటాయి.

ప్రేమని నటించేవాళ్ళు

తీపి మాటలతో ప్రేమని నటించేవాళ్ళు మన ఆప్తులు
నిజమైన ప్రేమ ఉండి దాన్ని వ్యక్తపరచలేని వాళ్ళు పొగరుబోతులు 
ఏంటో మబ్బుకి ఆకాశానికి వున్న వ్యత్యాసం తెలుసుకోలేక పోవడం !!

బాగున్నావా

ఈ మధ్య బాగున్నావా అంటే ఎలా వున్నావు అని కాకుండా ఎంత బాగా సంపాదిస్తున్నావు లా వినిపిస్తుంది

తపస్సు లేని వరదానమ

ఎన్నిసార్లైన ఆడపిల్లగా జన్మించడానికి సిద్దం

ఈ లోకం నిట్టూర్పుతో ఆడపిల్లగా నా జీవిత పయనం ఆరంభం
ఆ నిట్టూర్పు మిగిల్చిన నిరాశలో నే పుట్టిన సంతోషాన్ని పంచుకోలేని నా కన్నవారు 
ఆ నిరాశ నా నీడయై అనుక్షణం నేను ఆడపిల్లనని గుర్తు చేస్తూ గడచిన నా బాల్యం
ఆ బాల్యం పెనవేసుకున్న అనుబంధపు అక్షరాల పేజీని తిరగేస్తూ పెళ్లి అనే కొత్త జీవితపు అక్షరాలు దిద్దించే ఈ సమాజం
ఆ జీవితాన్ని డబ్బుతో వెలకడుతూ మనిషి విలువను దిగజార్చే వరకట్న దురాచారం
ఆ దురాచారపు లోగిలిలో నే ఎదిగే కొద్ది పెరిగే నా కన్నవారి గుండె బరువు
ఆ కన్నవారి మా ఇంటి మహాలక్ష్మి నుంచి ఆ ఇంటి కోడలిగా ఇంటిపేరుతో పాటు నా గుర్తింపుని కూడా కోల్పోయిన వేడుకకి సాక్షి పెళ్లి.

ఆడపిల్లనని నిరాశ ఎదురైన ప్రతిసారి నా భుజం తట్టే ఎన్నో మధుర జ్ఞాపకాలు, ప్రతి అడుగులో నే పంచుకున్న అనుబందాలు.

అమ్మకి సాయంలో తన చీర కొంగునై,జ్ఞాపకాలు పంచుకొనే నేస్తాన్నై
నాన్నకి చిరునవ్వుల ఉషోదయాన్నై,సిరివెన్నెల శుభరాత్రినై
తమ్ముడి చిలిపి చేష్టల ఆటబొమ్మనై, కన్నీటికి చలించే అలనై
అన్నను ఆటపట్టించే మబ్బు చాటు జాబిల్లినై, మమకారపు రాఖినై
ప్రియుడి అబద్దాలకైన కరిగిపోయే హిమపాతాన్నై,వంచనకు గుండె దాచిన కన్నీటి సముద్రాన్నై
భర్తకి అన్నిటా పుడమికి మట్టిలా తోడునై , కడదాకా ఆ మట్టిలో కలిసే పయనాన్నై

అన్ని బంధాలతో దేవుడిచ్చిన ప్రేమని పంచుకున్నానన్న సంతృప్తితో నా ఈ జీవిత పయనం ముగింపు.

నా సున్నితమైన మనసుని బలహీనతగా చేసుకొని వంచనకు గురికాని, ప్రతి తల్లిదండ్రి ఆడపిల్లే కావాలని కోరుకొనే వరకట్న దురాచార రహిత సమాజంలో ఎన్నిసార్లైన ఆడపిల్లగా జన్మించడానికి సిద్దం.

అమ్మా, నా తొలి నేస్తం, నా ప్రియనేస్తం

అమ్మా, నా తొలి నేస్తం, నా ప్రియనేస్తం ............ 
నా కనులు కాంచిన తొలి స్వప్నలోకం నీ గర్బము
నా ఈ చిన్ని తనువుకి తొలి గూడు ఆ స్వప్నలోకం 
నా చెవులు విన్న తొలి సవ్వడి నీ గుండె చప్పుడు
నా పాదాలు నేర్చిన తొలి ఆట నీ ఉదరాన తన్నులాట


అమ్మా, నా తొలి నేస్తం, నా ప్రియనేస్తం ............
నా చిరునవ్వు నీ అందమైన మనసుకి ప్రతిరూపం
నా చిట్టి పలుకులు ఆ మనసు నేర్పిన సరిగమలు
నా ఆట పాట ఆ సరిగమల నాట్య విన్యాసం
నా కేరింతలు ఆ నాట్యానికి హావబావాలు

అమ్మా, నా తొలి నేస్తం, నా ప్రియనేస్తం........
నీ ఆకలి తెలిసేది నా చిన్ని బొజ్జ నిండినవేళ
నీ అలసట తెలిసేది నే హాయిగా పవళించినవేళ
నీ నిజమైన ఆనందం నా కేరింతలు చూసినవేళ 
నీ గుండెకి చెప్పలేని బాధ నా ఏడుపుకి మరుమమెరుగనివేళ

నా ఈ కొత్తబంగారు లోకం పయనం వేళ బ్రహ్మ చెప్పిన వాక్కులు జ్ఞాపకం
ఆ లోకంలో ఎప్పటికి అమ్మ అనురాగం ప్రత్యేకం,ఆప్యాయత ప్రత్యేకం,మీ ఇద్దరి అనుబంధం  ప్రత్యేకం.

తామర తీగను మరిపించే చేతివేళ్ళు

కోనేటి తామర తీగను  మరిపించే నీ సున్నితమైన వేళ్ళతో ముడుచుకున్న ఆ చిట్టి చేతిలో నా చేతి వేలు స్మ్రుతించుకొన్న చిన్ననాటి తీపి జ్ఞాపకం,శీతాకాలం రవి తొలి కిరణాలతో అప్పుడే మేల్కొంటున్న పచ్చటి  మొక్కలపైన చల్లటి నీటి బిందువుల్ని స్పృశించిన మధురానుభూతి.

చిరు జల్లుల పులకరింత

ఇంకా పదాలు కూడా పలకలేని ఆ పెదాలు నా చెంపను ముద్దాడగానే, వర్షపు జల్లులతో స్నానమాడిన సిరిమల్లె చెట్టు, ఓ చిరుగాలి పలకరింపుతో పరవశించి ఒక్కసారిగా నాపై కురిపించిన చిరు జల్లుల పులకరింతలా అనిపించింది.

అద్బుతమైన ప్రపంచం

కను రెప్పల చాటున ఇంతటి అద్బుతమైన ప్రపంచం దాగి వుంటుందని తెలిసిన క్షణం, ఆ నయనాలు తదేకంగా నన్నే చూస్తుంటే ఒక్కసారిగా ఈ లోకం ఎంతో అందంగా అమాయకంగా కనిపించింది.

తొలి పలుకులు

బ బ బ ..... భ భ..... నీ హావ భావాలకి జతగా నేను సైతం అంటూ నీ గాత్రం చేసిన తొలి ప్రయత్నం . భానుడి రాకకై వేచి చూస్తూ పక్షులు పలికించే కుహు కుహు రాగాల సంగీతమంత మధురం .

నేర్పించడంలో వున్న అసలు సంతోషం

లేత గులాబీ పైన వాన చినుకు లాంటి నీ మృదువైన చేతులు పట్టుకొని నీతో ఒక్కో అడుగు వేయిస్తుంటే ప్రతి అడుగులో చెప్పలేని నీ సంతోషం చూసి మొదటి సారిగా నేర్పించడం లో వున్న అసలు సంతోషాన్ని నేను ఆస్వాదించాను

పైరగాలి

ఇంకా నడక కూడా నేర్వని నీ చిన్ని పాదాలు నన్ను తాకగానే, పచ్చటి పైరు మీదుగా వచ్చిన గాలి నా మోము తాకినంత హాయిగా అనిపించింది.